2025-yil 3-oktabr kuni Toshkent shahridagi Intercontinental (AZIMUT) mehmonxonasida xalqaro darajadagi yirik ilmiy-amaliy tadbir — Yevropa Urologiya Maktabi (European Urology School) bo‘lib o‘tadi. Ushbu tadbir O‘zbekiston urologiya sohasi vakillari uchun nafaqat nazariy bilimlarini boyitish, balki amaliy ko‘nikmalarini mustahkamlash, xalqaro tajribalarni o‘rganish uchun katta imkoniyat yaratadi.
Mazkur tadbirning asosiy tashabbuskorlari qatorida Toshkent davlat tibbiyot universiteti Urologiya kafedrasi ham bor. Kafedra ko‘plab mahalliy va xalqaro ilmiy loyihalarda faol ishtirok etib kelmoqda va bu safar ham yurtimizda urologiya sohasidagi eng yirik ta’limiy tadbirlardan birini tashkil etishda muhim rol o‘ynamoqda.
European Urology School (EUS) — Yevropa Urologiya Assotsiatsiyasi (EAU) tomonidan tashkil etilgan ta’limiy loyiha bo‘lib, urologiya mutaxassislari uchun muntazam ravishda yuqori darajadagi kurslar, seminarlar va treninglarni o‘tkazadi. Ushbu maktabning asosiy maqsadi — zamonaviy urologiyaning eng dolzarb yo‘nalishlari bo‘yicha bilim va amaliy ko‘nikmalarni xalqaro darajada standartlashtirishdir.
EUS dasturlarida odatda:
Urologik kasalliklarning tashxis va davosidagi eng so‘nggi yangiliklar,
Minimal invaziv va endourologik jarrohlik texnologiyalari,
Onkourologiya va reproduktiv salomatlik masalalari,
Klinik tajribalar va yangi davolash protokollari,
Mutaxassislar o‘rtasida tajriba almashinuvi kabi mavzular keng yoritiladi.
Intercontinental (AZIMUT) mehmonxonasida bo‘lib o‘tadigan mazkur maktabda yetakchi mahalliy va xorijiy mutaxassislar ishtirok etib, ma’ruzalar, klinik holatlar muhokamasi va interaktiv seminarlarni o‘tkazishadi. Tadbir davomida urologiya amaliyotida dolzarb bo‘lgan mavzular yoritilishi, shuningdek, yosh urologlar uchun mahorat darslari ham tashkil etilishi rejalashtirilgan.
O‘zbekistonlik urologlar uchun xalqaro ilmiy maydonda o‘z tajribalarini taqdim etish,
Urologiyada global yondashuv va innovatsion texnologiyalarni o‘rganish,
Yosh mutaxassislar uchun ustoz-shogird tajribasini yanada mustahkamlash,
Mintaqaviy va xalqaro ilmiy hamkorlikni kengaytirish imkonini beradi.
❗️Hamkasblarimizni mazkur tadbirda faol ishtirok etishga va xalqaro tajribani birgalikda o‘rganishga chorlaymiz.
